今年既香港小姐入面，有一個女仔我認得，我地讀同一間大學。

我地果間大學，算係一間世界著名既學府。呢位佳麗本身有學歷有家底又有高薪厚職，我同朋友聽到佢去選港姐，都覺得不可思議。呢一份放低現在擁有的﹑去嘗氣的勇氣，米多莉好尊敬佢。

放低擁有既，去探索未知，其實真係好犀利。米多莉又另有一個朋友，細個既時候成績特別好，香港高考竟然考到5個A，人人都對佢讚口不絕，覺得佢前途無量。

Well 我都覺得佢前途無量，不過成年後有一日我地飲多左杯，佢先同我講話自己細個既夢想其實係去做機艙服務員。不過果陣佢考試太好，屋企人想佢做律師醫生銀行家呢類傳統行業，佢連提都唔敢提自己既夢想。

知識改變命運，有時候我覺得考試考得好，正路係開一條易行既路俾自己，有好多options可以揀，舒舒服服咁過日子。不過事實又唔一定喎，當你愈叻﹑賺到愈多錢既時候，身外物愈多，可以放得低既就愈少，因為你個comfort zone真係好comfortable。

一個做野所謂冇乜特別前途既人，話做working holiday，去澳洲農場剃羊毛，或者係易過果D金融才俊去take一年gap year，因為佢地呢幾年既努力，對佢地既仕途可能有好大影響都唔一定。

放唔低身外物，又係咪果個人本身既錯呢？或者都係所謂既First world problem，連三餐都解決唔到人唔一定會care 夢想呢D咁天方夜譚既事。Oh well，或者都係兩個條件︰睇下你看重既係乜野，又睇下你夠唔夠guts。

你地記唔記得會考中文讀過陶淵明有篇文章叫歸去來辭。個背景係陶淵明屋企好窮，「餘家貧，耕植不足以自給」，於是就去左做官。但係做官做左十三年之後，，陶淵明始終敵不過「少無適俗韻﹑性本愛丘山」呢份性格，最終不為五斗米折腰，帶住老婆仔女再一次返鄉下耕田。陶淵明曾經生活一種咩都冇既日子，當佢擁有身外物之後，卻依然認為自己「誤墮塵網中」，都係揀返咩都冇日子。

我以前去過王迪詩既一個talk，有fans問佢如果買唔起Jimmy Choo，佢仲做唔做全職作家。我記得，佢遲疑左一陣，不過個答案都係唔會做。佢既答案令到我覺得佢好平凡同時又好不平凡。平凡在於佢係咁真實，係陶淵明既相反，非常肯為五斗米折腰；同一時間，又俾佢achieve到一個魚與熊掌兼得既局面，成為出名作家又可以買靚鞋，呢個成就則絕不平凡(千祈唔好覺得女作家愛買鞋咁庸俗呀，J.K.羅琳其實都好鐘意買鞋)。

係凡夫俗子和追求夢想之間，我地又有幾多個人真係陶淵明？一個咩都冇既人或者俾一個擁有一點點的人來到灑脫呢。我係一個港女，最叻都係扮下文青寫下文章，要我辭職做全職文人，well，can you please pay me first?